Nais kong ipaalam sa iyo ang nakatagong kasaysayan
ng isang halik, mga buwang pumapaimbulog

patungo nitong sandali, mula sa nakaraan
habang naglalaho ang mga patlang na nilalamanan

ng hininga, at sa huli, magluluwal ng salita.
Oo, nais kong ipaalam sa aking katawan

na muli akong masasaktan, pero hindi ngayon,
alam kong hindi iyon ngayon. Kay ligaya ng paglaho

ng mga espasyo upang umiral ang pagtagpo,
ang pagbalatkayo ang lahat ng tula, lahat ng gabi't lahat

ng pagkakataong natagpuan ko ang sariling nakatanga
sa mabagal na paglalakbay ng isang ulap,

o sa pag-imbay ng mga halaman sa hangin,
lahat nitong bumabalatkayo bilang balat, hininga, balat.